Guía de nomes galegos

Helenización do nome feminino arameo Xalôm, que probablemente, por etimoloxía popular, se relacionaba con xalôm 'paz', pero que máis ben debe ter que ver coa raíz verbal xalam 'substituír'. O significado orixinario do nome sería 'Deus substituíu', que sería imposto a nenos nacidos despois dun fillo morto, ao cal 'substituirían'. Foi considerado tamén como a forma feminina de Salomón.

Salomé, segundo o evanxelista san Marcos, era filla de Herodías, a muller de Herodes Antipas, a quen lle pediu, inducida pola nai, a cabeza de Xoán o Bautista como recompensa por unha danza. O Bautista denunciara a unión incestuosa de Herodías co seu tío Herodes.

Santa María Salomé era a esposa do Cebedeo, nai de Santiago o Maior e do evanxelista Xoán; foi unha das mulleres que acompañou a Cristo na cruz e que despois foi visitar o seu sartego baldeiro.

O episodio da danza de Salomé e da cabeza do Bautista inspirou a moitos artistas —escultores e pintores— ao longo da historia; tamén a escritores e a músicos: Chaumont, Eugène Sue, Heine, Mallarmé, O. Wilde, Apollinaire, R. Strauss etc.