Guía de nomes galegos

Do hebreo Rivká 'lazo, vínculo', literalmente 'nó corredizo', de rabak 'atar'.

O nome pode referirse á firmeza do vínculo matrimonial, pero o seu valor, en sentido figurado, de 'fermosa, desexable', procede da imaxe dos animais cebados e atados para o sacrificio.

O nome común de rebeca para unha chaqueta feminina de punto abotoada por diante ten a súa orixe na que levaba a actriz Joan Fontaine no filme Rebecca (1940) dirixido por Alfred Hitchcock, baseado nunha novela de 1938 do mesmo título da británica Daphne du Maurier.

En todo caso, Rebeca é un nome bíblico, presente no libro da Xénese: o da muller de Isaac. Segundo o relato bíblico, Abrahán encargoulle ao seu servo Eliecer que fose buscar muller para o seu fillo á súa terra e da súa parentela, pois non quería desposalo cunha cananea. Eliecer púxose ao lado dun pozo: aquela muller que lle dese de beber sería a destinada para Isaac. Así o fixo Rebeca, que era da estirpe de Naxor, o irmán de Abrahán. Ela accedeu e casou con Isaac, e tiveron dous fillos xemelgos: Esaú e Xacob. A nai sentiría preferencia polo segundo e enganaría o seu home para que fose unxido como primoxénito en detrimento da lexitimidade de Esaú.