Guía de nomes galegos

Nome da Virxe desta advocación, do catalán Mare de Deu de la Mercé 'Madre de Deus da Mercé', patroa de Barcelona desde 1637. A palabra mercé é descendente semiculto do latín merces, -edis ‘paga, recompensa’, derivado de merx, mercis (‘mercadoría’); despois pasaría a significar 'misericordia, perdón'.

A orde militar da Mercé fundouse en 1218 en Barcelona para a redención de cativos en terras islámicas. O seu fundador foi san Pedro Nolasco. O primeiro templo á Virxe da Mercé data de mediados do século XIII. Despois dunha praga de lagosta, en 1637 o Concello de Barcelona proclamou a Virxe da Mercé patroa da cidade en substitución de santa Baia. En 1696 o papa Inocencio XII espallou o seu culto a toda a Igrexa.

En Galicia lembramos a mestra e xornalista Mercedes Vieito (1887-1960), nacida en Cuba, defensora da identidade cultural galega, a e pintora e escritora Mercedes Ruibal (1928-2003).

A marca alemá de automóbiles de luxo Mercedes-Benz ten a súa orixe no nome de Mercédès Jellinek, filla do austríaco Emil Jellinek e da súa esposa Rachel, xudía de orixe sefardí. A principios do século XX, Jellinek era distribuidor en Austria dos automóbiles Daimler de Stuttgart e anotábaos co nome da súa filla; cunhas modificacións acabaría creando o novo modelo Mercedes-Benz.