Guía de nomes galegos

Do nome latino tardío Leocadia, que pode ser unha adaptación do grego Leukadía, nome dunha illa preto de Acarnania e dunha rocha da rexión do Epiro, en Grecia. Deriva do adxectivo leukós 'branco, luminoso' 'a branca', 'a resplandecente'. A evolución galega é semellante á de Eusebii > Osebe.

Locaio, fillo de Icario e irmán de Penélope, foi o fundador da illa de Léucade.

Santa Locaia (séculos III-IV) era, segundo a tradición, orixinaria de Toledo. Por negarse a abxurar das súas crenzas cristiás, sufriu martirio. É unha das santas máis antigas no culto hispánico (século VII). É patroa de Toledo. As súas reliquias foron trasladadas no século IX -talvez por mozárabes- á catedral de Oviedo, e desde este lugar espallouse o seu culto nos novos lugares de asentamento en territorio galego. En Galicia hai cinco parroquias baixo a súa advocación.