Guía de nomes galegos

Nome da literatura medieval, quizais relacionado co galés medieval Essylt, que debía significar ‘fermosa’. Tamén hai quen lle atribue orixe xermánica, composto de *isan- 'ferro' (ou de *is- 'xeo') e *hildi 'batalla, combate'. A variante Isolda é unha forma latinizada que se popularizou a partir da ópera de Wagner, en 1865, titulada Tristan und Isolde.

Nas lendas do mundo céltico medieval fálase de dúas Iseus ou Isoldas –“a loura” e “a das brancas mans”— que tiveron amores tráxicos con Tristán. A primeira, princesa de Irlanda, embarca para desposarse co rei Marco de Cornualla, pero na travesía namórase de Tristán, amigo do rei. Marco casa con Iseu, pero desterra ao Cornualla bretón a Tristán, que accede a casar con outra Iseu, “a das brancas mans”, unicamente por amor a este nome. Nestas lendas inspirouse Richard Wagner para o seu famoso drama musical Tristán und Isolde (1865).