Guía de nomes galegos

Nome tomado do latín eclesiástico Isaac e do grego bíblico Isaak que, á súa vez, o toman do hebreo Yizhaq, do verbo zahaq 'rir'. A lenda di que Sara, a súa nai nonaxenaria, riu incredulamente cando Abrahán, centenario, lle anunciou o próximo nacemento dun fillo. Hoxe interprétase máis ben como un nome  augural: 'Deus ha de sorrir', 'que Deus poida sorrir', 'El ri'.  

Isaac (c. 1800-1700 a. C.) foi o segundo dos patriarcas do pobo hebreo, fillo de Abrahán e de Sara, cando xa eran case centenarios. Segundo o relato bíblico, sendo Isaac un mociño, Iavé ordenoulle a Abrahán que llo ofrecese en sacrificio, e, cando este xa tiña o coitelo ergueito para cumprir o desexo divino, un anxo do Señor detivo a súa man e deixoulle un año no seu lugar. O sacrificio de Isaac, que sería moi representado na arte, é semellante ao da Ifixenia helena. Isaac casaría con Rebeca e foi pai de dous xemelgos: Esaú e Xacob.

No cristianismo hai un santo Isaac, o Dálmata (século IV), e outro do século IX en Córdoba.

O físico inglés Isaac Newton (1643-1727), o compositor español Isaac Albéniz (1860-1909) e o artista e empresario galego Isaac Díaz Pardo (1920-2012).

Isaac Fraga (1888-1982), produtor e empresario cinematográfico galego, un dos primeiros exhibidores cinematográficos ambulantes que percorreron a xeografía galega.

Isaac Peral (1861-1895), mariño español, inventor do submarino, o primeiro da historia.