Guía de nomes galegos

Deriva do nome persoal grego Eirēnaîos 'dedicado á deusa da paz', que pasou ao latín —primeiro como xentilicio e despois como nome propio— como Irenaeus ou Ireneus 'consagrado á paz'. Entre os cristiáns tomou máis ben o significado de 'o pacífico'.

Santo Ireneu de Lión (c. 130-c. 208) naceu en Esmirna (Asia Menor), pero aparece integrado nunha colonia cristiá grega instalada na Galia. Foi bispo de Lión e despois marchou para Roma como conselleiro do papa Vítor I. Participou activamente nas disputas teolóxicas do seu tempo e considérase un dos grandes teólogos do século II.