Guía de nomes galegos

A través do grecolatino Isaías chegounos este nome do hebreo Ysha'iah ou Ysha'iahe, composto pola raíz do verbo ysh' 'salvar' e Iah, abreviatura de Iavé 'Deus'. O significado conxunto sería: 'Deus salva', 'Deus é salvación', 'Deus procura a salvación'.

Isaías (século VIII a. C.) foi un profeta bíblico que desenvolveu a súa función no reino de Xudá, ou reino do sur (Israel era o do norte), durante o apoxeo imperial asirio. As súas profecías céntranse no mesianismo, patente en dous temas: a elección divina de Xerusalén e a dinastía do rei David. Acabaría retirándose da vida profética porque xa ninguén lle facía caso. Morreu martirizado polo rei Manasés, que o serrou en vivo.

Isaiah Berlin (1909-1997), politólogo e historiador, un dos principais pensadores liberais do século XX. Nacera en Letonia, cando este país aínda pertencía ao imperio ruso, pero acabaría exiliándose coa súa familia a Gran Bretaña, onde adquiriría a nacionalidade británica.