Guía de nomes galegos

Nome de orixe xermánica, transmitido a través do francés Hildegarde, composto de dous elementos: *hildi ‘combate’ e mais gards ‘casa; patio, curral’.

Santa Hildegarda de Bingen (1098-1179) foi unha mística bieita alemá coñecida como “a sibila do Rin”; pasou á historia como filósofa, historiadora, curandeira e mesmo profetisa. Fundou o mosteiro de Rupertsberg, preto de Bingen, na Renania. As súas visións místicas déronlle gran sona, pois mesmo a visitou Bernaldo de Claraval. Tamén escribiu un tratado de medicina.

Na novela do galego Ramón Nicolás O espello do mundo (2016), Ona Guiomar, abadesa do cenobio feminino de Ramirás en Galicia, mantén unha íntima relación epistolar coa mística de Bingen, correspondencia centrada sobre todo nas propiedades medicinais das plantas.

Hildegart Rodríguez Carballeira (1914-1933) foi unha nena galega rigorosamente planeada desde a concepción pola súa nai, a ferrolá Aurora Rodríguez, que a educou cunha disciplina férrea, sen aloumiños nin xogos. Foi unha rapaza prodixio. Non obstante, cando aos 18 anos intentaba liberarse da tutela da nai, esta matouna. A súa historia contouna nunha novela, Aurora de sangre: vida y muerte de Hildegart (1972), Eduardo Guzmán, e foi levada ao cinema por Fernando Fernán Gómez: Mi hija Hildegart (1977).