Guía de nomes galegos

Do hebreo Gabriél, nome teofórico que contén un dos nomes de Deus, el, unha forma abreviada de Elohim 'Iavé'; no seu primeiro elemento contén a raíz verbal gabar 'ser forte'.

Gabriel é un dos catro anxos máis importantes do xudaísmo (o cristianismo denomínao arcanxo, fundándose na literatura apocalíptica), porque é o 'mensaxeiro', o anunciador, o asistente de Deus por excelencia: Deus mandouno onda o profeta Daniel para explicarlle o significado das súas visións, onda Zacarías para anunciarlle o nacemento de Xoán o Bautista, e onda María para anunciarlle o de Cristo. No Islam revela a Mahoma a súa misión e dítalle o Alcorán.

Os escritores Gabriela Mistral, chilena, Premio Nobel de Literatura en 1945, e Gabriel García Márquez, colombiano, Premio Nobel de Literatura en 1982.

En Galicia lembramos a Gabriel Feixoo de Araúxo, autor do Entremés famoso sobre a pesca no río Miño (1671), unha das poucas obras literarias en galego nos Séculos Escuros. Trata dunha pelexa entre galegos e portugueses nas beiras deste río, reflexo serodio das batallas sanguentas que anos antes se libraran na fronteira con motivo da guerra da independencia portuguesa.