Guía de nomes galegos

Do latín Florentius, e este de Florens, Florentis, cognome romano formado a partir do participio presente do verbo floreo 'florecer', de significado transparente: 'que florece, que está en flor'. Dado o seu carácter  augural, usárono os primeiros cristiáns, polo que hai moitos mártires e santos deste nome.

San Florencio de Sardeña (século V) foi un bispo africano deportado a esta illa, onde morreu. San Florencio de Estrasburgo (século VII), fillo dun príncipe irlandés, fíxose ermitán en Alemaña e despois fundou a diocese de Estrasburgo, da que foi bispo.

Santa Florencia foi mártir en Béziers (Francia) nos tempos de Diocleciano (303-304).

Florencio López González (1914-1986), da Fonsagrada, chamado o ‘Cego dos Vilares’, o último dos cegos violinistas populares; deixou un nutrido repertorio musical.

Florencio Vaamonde Lores (1860-1925), poeta das Irmandades da Fala e académico cofundador de Real Academia Galega. Traduciu ao galego a Anacreonte.

Florencio Cerviño (1857-1941), bispo de Ourense dende 1921, e autor de obra poética.

Florencio Delgado Gurriarán (1903-1987), natural de Vilamartín do Valdeorras, avogado e escritor galego. Tras o golpe de Estado de 1936 logrou fuxir da persecución dos falanxistas da súa comarca e incorporouse ao exército republicano. Rematada a guerra exiliouse en México, onde participou en actividades galeguistas. A RAG dedicoulle o Día das Letras Galegas 2022 pola súa obra poética, pola defensa dos valores democráticos en tempos difíciles e pola súa defensa da lingua e patrimonio histórico e cultural da comarca do Valdeorras.