O cabo de Fisterra, na comarca do seu nome —que substituíu o de Terra de Nemancos, xa presente na Alta Idade Media— é un lugar de gran simbolismo, onde moitos peregrinos a Santiago van rematar o seu camiño, pois desde tempos moi antigos era considerado o punto máis occidental do mundo coñecido, polo menos da Europa continental; hoxe sábese que o cabo da Roca (Sintra-Portugal) está situado un pouco máis ao oeste. Con todo, segundo estudos recentes, a área comprendida entre os cabos de Fisterra e de Touriñán convértese dous meses ao ano na costa do solpor da Europa continental por onde máis tarde se pon o sol.
