Guía de nomes galegos

Do latín Stephanus, nome testemuñado esporadicamente en Roma na era precristiá, usado probablemente só por gregos ou orientais. Reproduce á súa vez o grego Stéphanos, nome persoal moi antigo e tamén nome común stéphanos 'coroa'. De Estevo deriva o apelido galego Estévez do mesmo xeito que do castelán Esteban deriva o apelido castelán Estébanez. A forma feminina de Estevo significa 'coroación'.

Santo Estevo (século I), diácono dos apóstolos de Cristo, foi o primeiro protomártir cristián, condenado a ser lapidado polas leis xudaicas por blasfemar contra Moisés. Estevo é un dos santos máis antigos do culto hispano.

Santo Estevo I, papa (257-260), proclamou a validez do bautismo realizado por clérigos apóstatas, en contra da opinión de san Cibrán e doutros bispos do norte de África.

Santo Estevo I de Hungría (969-1038) foi o primeiro dos reis maxiares en se converter ao cristianismo.

Houbo varias santas ou beatas co nome feminino; unha delas relixiosa en Brescia (Italia) no século XVI. A difusión moderna da variante Estefanía foi debida a modelos franceses ou a que a levaron familias principescas europeas.

O escritor e maxistrado francés Étienne de La Boétie (1530-1563); o escritor, biógrafo e activista social Stefan Zweig (1881-1942), de orixe xudía e austríaca, posteriormente nacionalizado británico e o físico inglés Stephen W. Hawking (1942-2018).