Guía de nomes galegos

Nome de introdución recente e procedencia anglosaxoa que parte dun composto xermánico constituído pola raíz gótica athal 'nobreza' e a franca wins 'amigo'. A forma xermánica pervive independente nos nomes femininos inglés e alemán Ethel.

Santa Etelvina casou co rei Alfredo o Grande de Inglaterra (871-899). Como fixera voto de castidade perpetua, o seu casamento non se consumou. Con todo e iso, segundo a lenda, Alfredo cansou de vivir coma un irmán da súa esposa e intentou xacer con ela, pero esta fuxiu e refuxiouse nun promontorio (o Colbert Head). O monarca pretendeu acceder a este lugar, pero unha marea milagrosa que durou unha semana impediullo e acabou desistindo. Tras o falecemento de Alfredo tempo despois, a raíña Etelvina fundou un convento beneditino en Winchester, no cal viviu o resto da súa vida. As súas reliquias atópanse no santuario desta abadía bieita, que tomou o seu nome.