A lenda de santa Eufemia conta que era filla dun senador romano da Calcedonia e que foi mártir baixo Diocleciano (303-304). Así e todo, como o seu culto é moi antigo en Galicia, popularmente tense por santa galega ou, polo menos, profundamente galeguizada. É un caso semellante ao de santa Mariña, e, coma ela, sometida a un proceso de localización do seu berce nativo: para uns no bispado de Ourense; para outros nunha ermida da diocese de Tui. No norte de Portugal considérana natural de Braga. Na versión galega lígana a antiquísimos cultos de fecundidade. É titular de once parroquias galegas.
