Guía de nomes galegos

Nome bíblico (Ester no texto hebreo, Esthḗr no grego e Esther na Vulgata). Considérase de orixe persa, relacionado co persa (i)stareh 'estrela', con raíz nunha antiga palabra indoeuropea, *ster-, que aínda vive en moitas linguas: alemán Stern, inglés star, latín stella etc. Tamén se ten posto en relación coa divindade asirio-babilonia Istar, que, como apelativo, significaba 'deusa', e era a deusa do Amor. Ester, na tradición bíblica, de nome hebreo Hadassah 'mirto', era unha muller de extraordinaria beleza que casou co rei persa Axuero, polo que se converteu en raíña de Babilonia.

No Libro de Ester do Antigo Testamento cóntase a historia desta muller, acontecida durante a catividade de Babilonia (século VI a. C.). Ester, moza de gran beleza, era a esposa —para outros a primeira concubina— do rei babilónico. O gran visir Haman decretara o exterminio dos hebreos cativos en Babilonia. Ante este perigo, Mardoqueo, tío de Ester, rogoulle que intercedese ante o monarca para evitar o xenocidio. Ela vestiuse coas mellores galas e, arriscando a súa vida —pois estaba penado presentarse de improviso ante o monarca—, introduciuse na cámara real e coas súas artes sedutoras logrou impedir os desexos malvados do visir. A mensaxe bíblica é que Deus se vale da beleza dunha muller fiel á tradición dos seus devanceiros para salvar o seu pobo e protexelo durante o exilio.

A historia bíblica de Ester foi tema para pintores e escritores de todas as épocas; tamén para os cineastas, mesmo en tempos ben recentes, con filmes e series de televisión.