Guía de nomes galegos

Nome clásico romano difundido no Renacemento. Vén do latín Aemilius e a súa orixe é discutida: quizais proveña do nome persoal etrusco Aemus ou Aimos. A variante feminina Milia xa se documenta en 1451.

Houbo polo menos catro mártires e santos con este nome: un en África (século II) durante o imperio de Septimio Severo; outro en Capua (Italia), do século IV; outro na illa de Córsega xunto a san Fiz, Luciano e Príamo; e outro en Córdoba no século IX.

Entre as santas están santa Emilia de Lión, mártir do século II; santa Emilia de Vercelli (Italia), do século XIV; e santa Emilia de Rodat (Francia), séculos XVIII-XIX.

Contribuíu á difusión do nome o tratado sobre a educación Emilio ou Da educación, publicado por J. J. Rousseau en 1762.

O historiador e político Emilio González López (A Coruña, 1903 - Nova York, 1991), deputado na II República e un dos promotores do Estatuto de Galicia; exiliado como consecuencia da derrota republicana na guerra civil española, deu clases de historia de España e de Galicia na Universidade de Nova York. Restaurada a democracia en España, en 1991 foi nomeado Cronista Oficial de Galicia.

Emilio Álvarez Giménez (Puebla de Sanabria 1830 - Pontevedra 1911), dramaturgo e político ligado ao liberalismo e ao rexionalismo galego.

Na forma feminina destaca a escritora galega en lingua castelá Emilia Pardo Bazán (A Coruña, 1851 - Madrid, 1921), introdutora do naturalismo en España; a súa obra novelística, sobre todo a de temática galega, é recoñecida internacionalmente; foi tamén xornalista, crítica literaria, tradutora, editora e defensora dos dereitos das mulleres.

A escritora Emilia Calé Torres (A Coruña, 1837 - Santiago, 1908) cultivou todos os xéneros literarios e acadou sona como poeta; foi unha das poucas mulleres nomeadas correspondentes pola Real Academia Galega na súa fundación (1906).

A viguesa Emilia Docet (1915-1995), deportista, modelo, Miss Galicia e Miss España en 1933; activa militante do Partido Galeguista, a propaganda que conseguiu cos seus títulos levouna a participar no mítin das Arengas, acto de exaltación de Galicia nas véspera do 25 de xullo; tamén participou en actos públicos do PG a favor do Estatuto Galego de 1936.