Guía de nomes galegos

Cultismo de Ousenda.

A variante Adosinda foi de bastante uso no reino altomedieval de Galicia. Un exemplo poden ser estas mulleres, pertencentes á alta nobreza galaica da época:

A condesa Adosinda (séculos IX-X), esposa do conde de Lugo, Ero Fernández, foi nai de Ilduara Eriz (santa Aldara de Celanova) e avoa de san Rosendo.

Adosinda Gutérrez (século X), irmá de san Rosendo, era filla de Guterre Méndez e de Ilduara ou Aldara Eriz, neta de Hermexildo Gutérrez (o conquistador de Coímbra) e de Ero Fernández de Lugo.

Adosinda Gutérrez (século X), da poderosa casa nobre dos Gutérrez galegos (á que pertencía san Rosendo), era filla de Guterre Osorio e de Aldonza Méndez e neta do conde galego Hermexildo Gutérrez e de Elvira Méndez; foi a primeira esposa, e polo tanto, raíña consorte, do rei galaico-leonés Ramiro II, e nai do rei Ordoño III.

Adosinda Gunterices (século X), esposa do dux de Galicia Rodrigo Vásquez e nai de Paio, bispo de Santiago que substituíu a san Rosendo.

Dosinda Areses foi un pseudónimo xornalístico usado polo escritor Xosé Luís Méndez Ferrín.