A difusión do nome parte da igrexa de Santa María do Cebreiro, situada no Camiño de Santiago, que conserva a lenda do santo Milagre ou do santo Graal, que xa se contaba antes do século XV. Contra o ano 1300 un sacerdote desta igrexa, nunha noite de forte nevarada, misaba el só, sen ningún fiel no interior. No momento de consagrar a hostia entrou un devoto veciño da aldea de Barxamaior e, amolado, o crego murmurou: “Vir con este tempo de tan lonxe só para axeonllarse diante dun pouco de pan e viño...!” En rematando de dicir isto viu que a hostia se convertía en carne e o viño en sangue, e, coa impresión, caeu morto diante do altar.
Esta lenda é unha versión popular doutra céltica de orixe bretoa, recolleita na Demanda do Santo Graal da literatura medieval.
O escudo de Galicia incorporou como símbolo principal o cáliz do milagre do Cebreiro.
