Guía de nomes galegos

De orixe toponímica, o nome de lugar ten unha etimoloxía discutida. Tense proposto unha segmentación bego oina ‘estea aos seus pés’, pero a Eskaultzaindia considéraa sen base. Segundo Patxi Salaberri, os topónimos rematados en -oña adoitan proceder de nomes de persoa (como Argandoña, ‘a propiedade de Argantonius’). Este topónimo designa un outeiro próximo a Bilbao onde se encontra situado o santuario dedicado á Nosa Señora de Begoña, erixido no século XVI.

A Nosa Señora de Begoña é a patroa do señorío de Biscaia. O seu santuario está situado preto de Bilbao e formou parte do perímetro defensivo desta cidade durante os asedios carlistas do século XIX. O xeneral carlista Zumalacárregui foi ferido mortalmente neste lugar en 1835.

Begoña Caamaño, xornalista e escritora viguesa (1964-2014), tratou na literatura galega a mitoloxía grega (Circe ou o pracer do azul) e a materia de Bretaña (Morgana en Esmelle) con perspectiva de xénero.