Guía de nomes galegos

Procede dun nome francés ou catalán, Bertrand, composto polas raíces góticas bairths ‘claro, brillante; célebre, famoso’ e *rand ‘beira do escudo’.

San Beltrán (séculos XI-XII) foi bispo de Comminges no Languedoc (Francia). Reconstruíu a igrexa de Comminges sobre as ruínas da cidade romana anterior.

Bertrand du Guesclin (século XIV) foi un mercenario bretón que por orde do rei de Francia participou na guerra civil pola coroa de Castela entre Pedro I e Henrique de Trastámara, ao lado deste último. Disque fora el quen, no combate singular dos campos de Montiel entre os dous irmáns, interviñera para axudar fisicamente o Trastámara, poñéndoo por encima, mentres pronunciaba a frase “Eu non quito nin poño rei, pero axudo o meu señor”.

Beltrán de la Cueva (1443-1492) foi un nobre andaluz da corte do rei Henrique IV de Castela a quen se lle atribuíu a paternidade de Xoana, a filla do rei e herdeira lexítima do trono, razón pola que esta foi alcumada “la Beltraneja” polos partidarios da futura Isabel a Católica.

Bertrand Russell (1872-1970), filósofo, matemático e escritor británico, Premio Nobel de Literatura de 1950.