Guía de nomes galegos

É nome de etimoloxía discutida; uns din que xermánica, a través dunha forma nórdica, e outros gaélica.

O nome difundiuse a partir do século XVIII polos poemas de James Macpherson, quen chamou así ao fillo de Osián, o presunto autor dos antigos poemas gaélicos publicados por este poeta escocés, que se fixo pasar por tradutor deles.

Todo parece indicar que o espallamento deste nome polo continente europeo debe relacionarse coa moda do ossianismo, nos séculos XVIII e XIX.

Con todo, tamén houbo un santo Óscar (século IX) que, aínda que naceu en Amiens (Francia), considérase o apóstolo evanxelizador dos escandinavos. Hoxe é patrón de Dinamarca.

Óscar é tamén o nome dos premios anuais que, desde 1928, outorga a Academia das Artes e das Ciencias Cinematográficas de Hollywood (Los Ángeles, EEUU); ao parecer o nome llo dera a secretaria da Academia, quen, ao ver a pequena estatua dos premios, exclamou: “Parece o meu tío Óscar!”.

Dous monarcas nórdicos: Óscar I de Suecia e Noruega, francés de orixe (era fillo do xeneral francés Bernardotte, que o precedeu no reinado). Reinou de 1844 a 1859 e pasou á historia pola súa tolerancia e ansia de afianzar as reformas de carácter liberal.

Óscar II de Suecia e Noruega, terceiro fillo do anterior, gobernou de 1872 a 1905; mantivo a paz e foi un distinguido escritor e afeccionado á música. Ao final do seu reinado, en 1905, produciuse a independencia de Noruega, de maneira pacífica.

O escritor inglés de orixe irlandesa Oscar Wilde (1854-1900); os pintores Óscar Domínguez (1906-1957), español, e Oskar Kokoschka (1886-1980), austríaco; o arquitecto brasileiro Oscar Niemeyer (1907-2012), construtor de Brasilia; e o arcebispo salvadoreño Óscar Arnulfo Romero, asasinado en 1980 por militares do seu país, que foi considerado mártir e santo antes pola Igrexa anglicana que pola católica.