Guía de nomes galegos

Do topónimo catalán Mont-serrat 'monte serrado', 'en forma de serra'.

A orixe do culto á Virxe de Montserrat (Cataluña) remóntase a unha ermida moi antiga que o abade Oliba de Ripoll transformou en convento (século XI). O culto a esta advocación da Virxe espallouse por toda Cataluña e mesmo penetrou no Mediterráneo coa expansión catalano-aragonesa. A finais do século XIX, o papa León XIII proclamouna patroa de Cataluña. Durante a ditadura de Franco, o mosteiro de Montserrat converteuse no símbolo da firme defensa da lingua e cultura catalás. Tivera moita repercusión o caso do abade Aureli Maria Escarré, que a raíz dunhas declaracións a un xornal francés en 1963 en que criticaba a política anticatalá do goberno de Franco, tivo que abandonar o país dous anos despois e exiliarse en Italia.