Guía de nomes galegos

A súa etimoloxía é discutida, pois as opinións son dispares. Hai quen considera que procede do nome grego Moníkha, feminino de Mónikhos (variante de Monakhós). Se a orixe fose esta, o nome propio tería o mesmo significado ca o común grego monakhós 'eremita', derivado de mónos 'que vive só', de onde veñen monxe (monge / moine / monaco / monk / Munch) e mosteiro. Pero a forma primitiva do nome latino rexistraba -nn- (Monnica, nai de santo Agostiño), polo tanto hai que pensar nunha adaptación latina dun nome púnico. Finalmente, hai quen ve a orixe no nome persoal latino Monna, que corresponde a monna 'nai', 'esposa' da linguaxe infantil, semellante ao noso 'mamá'.

Santa Mónica de Tagaste (c. 331-387) naceu nesta poboación da actual Alxeria, no seo dunha familia cristiá. Casou moi nova cun home maior, romano e pagán, chamado Patricio, que tiña unha alta posición social en Tagaste. Soportou o temperamento violento e as infidelidades do seu marido e dedicou a súa vida á conversión ao cristianismo do seu fillo, o futuro santo Agostiño, que foi, precisamente, quen escribiría a historia da súa vida.