Guía de nomes galegos

Procede dunha advocación da Virxe: santa María a Maior. Era moi común na Idade Media: documéntase nos nosos textos desde o século X ao XVI. Presentaba as variantes Maor, Moor e Mor.

A basílica de Santa María a Maior de Roma —construída despois do Concilio de Éfeso (431), que confirmou para a Virxe o título de Nai de Deus— debe o seu nome a que foi a primeira e principal igrexa mariana da cristiandade.

Na Baixa Idade Media, moitas damas da nobreza galega levaban este nome: Maior Rodríguez (século XII), esposa do conde Pedro Froilaz de Traba; Maior Álvarez de Soutomaior (séculos XIV-XV); Maior de Ulloa, da casa de Lemos (século XV) etc.

María Maior Fernández da Cámara e Pita (século XVI) era o nome real de María Pita, a heroína coruñesa que no asalto da flota do corsario inglés Francis Drake á Coruña (1589) encabezou un grupo de mulleres que tamén empuñaron as armas ao carón dos homes na defensa da cidade.