Maeloc ou Maelog (século VI) foi un bispo celta de Gran Bretaña que, comandando un grupo de compatriotas, chegou ás costas norteñas de Galicia fuxindo da invasión anglosaxoa. Contra o ano 450 desembarcan nas Illas Británicas os xutos, anglos e saxóns e empuxan os britanos cara a Gales, Cornualla e Escocia (son os tempos da lenda do rei Artur). Outros embarcaron cara ao continente e instaláronse na Armórica —que pasaría a chamarse Bretaña—, e outros chegarían ás costas da Mariña luguesa, como sería o caso do bispo Maeloc, que axiña se integraría coa súa xente no reino suevo da Gallaecia. O bispo Maeloc participou no I e II Concilio de Braga —dos anos 561 e 572, respectivamente— en representación da diocese de Britonia, antecesora da de Mondoñedo. A Britoniensis ecclesia —talvez instalada en Bretoña (A Pastoriza)— subsistiu máis dunha centuria.
