Guía de nomes galegos

Do grego neotestamentario Magdalené, que pasou ao latín eclesiástico como Magdalena. Trátase dun sobrenome étnico que significa 'nativa ou proveniente de Magdala', aldea hebrea do sur do lago de Galilea. Magdala é a forma grega da hebrea Migdal 'torre'.

Os haxiógrafos discuten se María de Magdala, María de Betania (irmá de Marta e de Lázaro) e a pecadora anónima de quen fala o evanxelista Lucas eran ou non a mesma persoa. Con María de Magdala identificouse a muller pecadora pública que lle perfumou os pés a Xesús e llos secou cos seus cabelos. En calquera caso ela é a personificación das bágoas do arrepentimento, unha das poucas persoas que acompañan a Xesús na agonía da cruz e a primeira que o ve resucitado; como non consta nos Evanxeos que o vise a súa nai tras a resurrección, esta proximidade levou a algúns a especular sobre o posible matrimonio da Madalena con Xesús.

Madalena Iglésias do Vale (1939-2018) foi unha cantora portuguesa de fados. Magdalena Sibylla de Hesse-Darmstadt (1652-1712) foi rexente do Ducado de Württemberg de 1677 a 1693 e unha destacada compositora alemá de himnos barrocos.