Guía de nomes galegos

Do nome grego Leōnídas, composto de léōn 'león' e -ídēs 'forma', 'aspecto', é dicir, 'que ten aspecto de león' ou, se se quere, 'descendente do león'. A forma grega orixinal é Leonídas / Leonídēs. A versión latina fixo esdrúxula a palabra (Leónidas) por ser breve a penúltima; non obstante, en Galicia é máis popular a acentuación etimolóxica na penúltima sílaba.

Leonidas (século V a. C.), rei de Esparta, foi considerado un dos grandes heroes da antigüidade. Xunto con outros 300 hoplitas espartanos e outros gregos enfrontouse ao numeroso exército persa de Xerxes no paso das Termópilas (480 a. C.) e resistiu ata a morte para cubrir a retirada das forzas helenas. Tal fazaña, admirada e cantada en todas as épocas, celebrouna na literatura galega Eduardo Pondal no poema titulado Morrer en brando leito.

Houbo tamén un san Leonidas (séculos II-III), profesor de elocuencia en Alexandría (Exipto); foi pai do escritor e apoloxista cristián Oríxenes.

O mandatario ruso Leonid Ilich Brézhnev (1906-1982) foi o segundo presidente da Unión Soviética que permaneceu máis anos no goberno (de 1984 a 1982).