Guía de nomes galegos

Nome xermánico, derivado de Leudbald, composto de *leud- 'pobo, xente' e *balth- 'audaz, valente'. Deste nome medieval procede o topónimo Leobalde (Tordoia), pero o nome Leopoldo chegou moi posteriormente, por vía alemá ou inglesa.

San Leopoldo (1075-1136), da Casa Real de Austria, foi margrave deste país durante corenta anos; fundou mosteiros e por dúas veces rexeitou invasións húngaras. Canonizado en 1485, é patrón de Austria.

Foi un nome moi utilizado por duques e arquiduques da Casa de Austria, os Habsburgo, do século XII ao XVIII: emperadores de Austria como Leopoldo I (1640-1705) e Leopoldo II (1747-1792). Tamén o levou o primeiro rei de Bélxica (Leopoldo I, de 1831 a 1865); o segundo, Leopoldo II (1865 a 1909) é recordado polos métodos escravistas e xenocidas que utilizou no territorio africano do Congo, da súa propiedade exclusiva; o cuarto, Leopoldo III, reinou de 1934 a 1951.

O irlandés James Joyce deulle o nome de Leopold Bloom ao protagonista da súa novela Ulysses (1920).

Johann Georg Leopold Mozart ‘Leopold Mozart’ (1719-1787) foi un destacado compositor, profesor e violinista do Sacro Imperio Xermánico; ademais de pasar á historia pola súa participación na educación musical do seu fillo Wolfgang Amadeus tamén foi coñecido por un libro sobre a técnica do violín, traducido a moitos idiomas.

 O tudense Leopoldo Martínez Padín (1823-1850), autor dun dos primeiros libros de historia de Galicia: Historia política, religiosa y descriptiva de Galicia (Madrid, 1849), que non pasou do primeiro tomo pola súa prematura morte.

Os académicos correspondentes da RAG, Leopoldo Pedreira (1869-1915), xornalista, e Leopoldo Eijo Garay (1878-1963), bispo. O pintor Leopoldo Nóvoa (1919-2012).