Ite ou Amergin —segundo o Lebor Gabála Érenn ou Libro das invasións, manuscrito irlandés do século XII— é un dos fillos de Breogán, poeta e soñador, namorado do mar, que tiña por costume subir ao máis alto da torre de Brigantia (A Coruña), que seu pai construíra. Desde alí albiscou unha terra verde como Galicia. Convenceu uns amigos para ir visitala, botáronse ao mar nunha rudimentaria embarcación de pelellos e vimbios embreados e desembarcaron nos areais do sur de Érinn (Irlanda). Os pobos da illa (ou Tuath ou Tuatha) matáronos a todos e fixeron fracasar a invasión. Posteriormente os fillos de Mil —descendentes de Bile, o seu irmán e, polo tanto, descendentes tamén de Breogán— enviarían outra expedición a Irlanda, que desta vez si tería éxito. Esta sería a terceira e última das invasións de Irlanda, a procedente do noroeste da Península Ibérica, segundo o citado libro.
