Guía de nomes galegos

Antigo nome de orixe xermánica, moi atestado na documentación galega desde o século X, que presentaba na Idade Media a forma Guillelme como variante maioritaria. Está composto polas raíces góticas *wiljia ‘vontade, desexo; pracer, satisfacción’ e *hilms ‘elmo, casco’. A variante Guillén, presente tamén na época medieval, é de procedencia catalá ou occitana. No latín medieval aparece documentada a forma Guilielmus e Vilielmus.

Unha antiga lenda occitana identificaba a Guillerme de Aquitania (Guilhem X, conde de Tolosa e de Poitiers, morto en 1138) con Guillerme de Orange, paladín de Carlomagno e morto en 812. O duque de Aquitania peregrinou a Roma, a Xerusalén e a Compostela, onde morreu. Tamén se chegou a identificar co protagonista do romance de don Gaifeiros de Mormaltán, poema que Murguía tratou de pasar por tradicional, pero que en realidade foi obra súa de finais do século XIX.

Levaron este nome numerosos reis e emperadores europeos: en Inglaterra, o primeiro foi Guillerme I o Conquistador (século XI); o último, Guillerme IV (século XIX). En Alemaña destacan os emperadores Guillerme I e II; en Holanda, Guillerme I e II de Nassau, que loitaron contra os reis de España pola independencia dos Países Baixos. Guillerme Tell (século XII) foi o heroe lendario da independencia suíza.

Lembramos o personaxe do frade franciscano Guillerme de Baskerville da novela O nome da rosa (1980), do italiano Umberto Eco, ambientada na Italia medieval; no filme homónimo (1986) foi encarnado polo actor escocés Sean Connery.

Escritores famosos como o inglés William Shakespeare (1564-1616), o francés Guillaume Apollinaire (1880-1918), o norteamericano William Faulkner (1897-1962) ou o cubano Guillermo Cabrera Infante (1929-2005); filósofos como o inglés William de Ockham (1285-1349); científicos como o italiano Guglielmo Marconi (1874-1937) e políticos como o alemán Willy Brant (1914-1992).

Guillermo Álvarez Pérez (1867-1929), arquitecto e filántropo de Cortegada.