Guía de nomes galegos

Do topónimo árabe Wadi al-lub, que significa 'río agochado' ou 'río do lobo'.

O santuario da Virxe de Guadalupe está situado na serra de Las Villuercas (Estremadura), xunto ao río Guadalupe. Ten a súa orixe nunha lenda do século XII segundo a cal un pastor chamado Gil Cordero buscaba unha vaca que se lle perdera; cando a atopou morta tamén se lle apareceu a Virxe manifestándolle o seu desexo de ter unha ermida naquel lugar. Tras a vitoria do Salado contra os musulmáns, o rei Afonso XI mandou construír alí un mosteiro que se transformaría nun dos máis importantes santuarios españois dos séculos XVI e XVII. A devoción pola Virxe de Guadalupe pasaría a México, a raíz das supostas aparicións da Virxe, en 1531, a Juan Diego, un pobre nativo, falándolle no seu propio idioma.

A Virxe de Guadalupe é patroa de Estremadura, de México e tamén de Rianxo, onde ten unha festa moi sonada; faise referencia a ela na coñecida canción A rianxeira.

Guadalupe Grande (1965-2021), poeta, ensaísta e crítica española.

Guadalupe Peña (1910-2002), escritora mexicana.