Nome dun lugar da parroquia de Nande (Laxe, A Coruña), da terra de Bergantiños. Como topónimo aparece nunha das poesías de Eduardo Pondal, como lugar de nacenza dunha das heroínas dos seus poemas: a garrida e doce Rentar. Pero na épica pondaliana é moito máis ca un simple nome de lugar: o poeta personificouno e converteuno nun bardo, no máis importante destes rapsodos celtas, cantores errantes das fazañas dos heroes e heroínas da súa raza.
O “bardo Gundar” é o propio Pondal, “o bardo da Brigandsia”, da máis pura aristocracia celta.
