Guía de nomes galegos

Nome de orixe xermánica e un dos poucos que, con Hugo, non é composto. A orixe é Karl, latinizado en Carolus (forma de onde procede o feminino Carolina). O outro feminino, Carla, pode vir a través do italiano.

Nun principio era un nome común que designaba un 'home libre pero sen bens de seu'; logo pasou a designar o cargo de 'mestre ou mordomo do pazo' entre os reis francos. Cando o poder destes mordomos medrou, karl pasou a ser un título. Finalmente chegou a ser nome propio.

Nome moi popular en Europa adoptado por varias familias reais desde a Idade Media: Carlomagno (‘Carlos o Grande’), rei dos francos (768-814), o máis famoso, intentou reconstruír o Imperio romano con capital en Aquisgrán. Levaron este nome sete emperadores do Sacro Imperio Romano, dez reis de Francia, cinco de España, un de Portugal, varios de Suecia e numerosos príncipes. Carlos I de España e V do Sacro Imperio Romano Xermánico (1500-1558) foi un dos de máis renome.

San Carlos Borromeo (1538-1584) foi o santo de máis sona con este nome. Membro da alta nobreza, xa era cardeal aos 22 anos. Fundou un dos primeiros seminarios e tivo sona pola súa actuación na gran peste de 1575. Participou no Concilio de Trento (1545-1563).

Charles Perrault (século XVII)  e Charles Dickens (século XIX), escritores; o científico Charles Darwin (século XIX); o filósofo alemán Karl Marx (século XIX); o militar e político francés De Gaulle (1890-1970); o cineasta Chaplin (1889-1977), inglés, e o papa Karol Wojtyla (Xoán Paulo II), 1920-2005.

Tamén é longa a listaxe de galegos notables deste nome; por citarmos dous deles: Carlos Maside (1897-1958), pintor e gravador, e Carlos Casares (1941-2002), escritor homenaxeado co Día das Letras Galegas de 2017.

Os nomes femininos de Carolina e Carlota difundíronse pola cortes reais europeas desde finais do século XVII (Sophie-Charlotte, esposa de Frederico III de Prusia) ata a actualidade.

Caroline Lucretia Herschel  (1750-1848), astrónoma e matemática alemá.

Carolina Otero (1868-1965) foi o nome artístico adoptado pola galega de Valga Agustina Carolina Otero,  a Bela Otero, famosa bailarina e cantante no París da Belle Epoque.

Carolina Michaëlis de Vasconcelos (1851-1925), filóloga alemá nacionalizada portuguesa, estudosa das linguas galega e portuguesa; parece ser que dela partiu a denominación “galego-portugués” para o galego medieval, común aos reinos de Galicia e de Portugal.

Carolina Casanova Rodríguez, coñecida como Carolina Casanova de Cepeda (1847-1910), soprano galega, considerada como unha das mellores da segunda metade do século XIX.