Guía de nomes galegos

Nome orixinado nunha advocación mariana, pero tamén evocador do Camiño de Santiago. A palabra vén do latín vulgar camminus 'camiño', que ten procedencia céltica (emparentada co irlandés céimm e o galés cam 'paso') e desprazou as palabras latinas via 'estrada' e iter 'viaxe'.

O santuario máis coñecido é o da Virgen del Camino, patroa de León, situado no Camiño francés a Compostela a poucos quilómetros da capital leonesa; segundo a lenda, houbo unha aparición milagrosa da Virxe neste lugar en 1505.

Como nome propio é frecuente nos diversos lugares polos que pasa algunha das vías xacobeas e nos cales hai ou houbo unha igrexa e hospital destinados a atender os peregrinos. En Galicia hai igrexas dedicadas á Virxe do Camiño en Muros, Pontevedra e na propia cidade de Santiago, no tramo derradeiro do Camiño francés.