Guía de nomes galegos

Do hebreo Hannah '(Deus) axudou / tivo misericordia'.

Na Biblia hai polo menos tres mulleres con este nome; unha delas, a profetisa Ana de Xerusalén, que segundo o evanxelista Lucas recoñece o neno Xesús como o Mesías prometido. A principal foi santa Ana, considerada pola tradición nai da Virxe María e avoa de Xesús, cousa que non se recolle en ningún dos evanxeos canónicos; só nos apócrifos, como no Protoevanxeo de Santiago. O seu culto desenvolveuse na época das cruzadas. É a santa nacional da Bretaña francesa, onde conta cun dito semellante ao de Santo Andrés de Teixido: “De vivo ou de morto ao santuario de santa Ana debe ir todo bretón”.

Ana da Bretaña (1477-1514) foi a derradeira duquesa da Bretaña e dúas veces raíña de Francia. Casou primeiro con Carlos VIII en 1491 e co seu sucesor Luís XII. Aínda que nas cláusulas matrimoniais establecera certos privilexios para o seu ducado, o certo é que esta unión supuxo a definitiva perda da independencia bretoa.

Ana foi nome de raíñas e princesas de toda Europa.  Anne Boleyn, segunda esposa de Henrique VIII e raíña consorte de Inglaterra durante só tres anos (1533-1536).  

Na literatura, a novela Ana Karenina (1877) de Lev Tolstoi contribuíu a popularizar o nome.

Anne Frank (1929-1945), xudía alemá emigrada ós Países Baixos, durante a segunda guerra mundial agachouse nun faiado en Amsterdam para salvarse dos nazis, aínda que finalmente morreu con case toda a súa familia no campo de concentración de Auschwitz.  Escribiu un Diario que se fixo mundialmente coñecido.