Guía de nomes galegos

Nome de introdución recente e orixe etimolóxica discutida, quizais dunha raíz xermánica (amal ‘valente’) ou escandinava (aml ‘traballo’). Difundiuse probablemente a partir do italiano. Ten a mesma orixe que Amelia.

Santa Amalia de Gante (século VIII) —tamén chamada Amalberga (e mesmo Amelia)— era sobriña de Pipino I o Vello ou Pipino de Landen (na actual Bélxica), mordomo de reis merovinxios e fundador da dinastía pipínida-carolinxia. Segundo a lenda, Carlos Martel pedira a súa man e tanto insistiu o pretendente que lle acabou dislocando un brazo. Ela rexeitouno e casou co conde Witger, e foi nai de santa Gúdula e de santa Reinalda. Ao enviuvar dedicouse á vida relixiosa e realizou milagres, como o de librar a Flandres de bandadas de gansos salvaxes que destruían as colleitas. É padroeira dos homes do mar e evócase para a curación das luxacións dos membros.

De santo Amalio tense dito que foi arcebispo de Sens (Borgoña-Franco Condado) no século VII, pero nin sequera nesta cidade francesa se lle dispensa culto. Talvez non existise ningún santo que o levase e o nome posiblemente sexa unha simple adaptación masculina do nome feminino.

Princesas reais como Amalia Augusta de Baviera (1801-1877) e Amalia de Borbón (1834-1905), infanta de España. Tamén levou este nome a fadista portuguesa Amália Rodrigues (1920-1999).

Pedro Amalio López (1929-2007) foi un dos realizadores pioneiros de televisión en España.

Amalia de la Rúa Figueroa-Somoza (1830-1915), nai de Emilia Pardo Bazán.

Amalia Álvarez Gallego, filla de Xerardo Álvarez Limeses e esposa de Alexandre Bóveda.