Guía de nomes galegos

Do latín Augustinus, derivado de Augustus 'de bo agoiro, venerable'.

Santo Agostiño (354-430), bispo de Hipona (norte de África), foi un dos catro doutores da Igrexa latina. Antes da súa tardía conversión ao cristianismo fora seguidor do maniqueísmo. Relacionouse co presbítero galaicorromano Paulo Orosio, un dos grandes escritores da antiga Gallaecia en lingua latina, que o visitou no ano 414. Escribiu A cidade de Deus —parece ser que axudado por Orosio— e defendeu a síntese entre a cultura clásica e a cristiá. Era unha época na cal os intelectuais pagáns atribuían ao avance do cristianismo as desgrazas e calamidades do momento, como a invasión dos pobos “bárbaros”. Para rebater estas opinións, Agostiño animou o historiador galaico a escribir unha historia universal en que se demostrase, entre outras cousas, que as calamidades viñan desde tempos inmemoriais (véxase Orosio).

Agustín Fernández Paz (Vilalba 1947 - Vigo 2016), escritor de literatura infantil e xuvenil traducido a moitos idiomas. Entre outros, recibiu o Premio Nacional de Literatura Infantil e Xuvenil (2008).

Agustín Sixto Seco (1926-2004), médico e intelectual galeguista e membro correspondente da Real Academia Galega.

Agostinho Neto (1922-1979), médico e poeta, primeiro presidente da República de Angola (1975-1979).

Agustina Carolina Otero Iglesias (1868-1965), ‘Carolina Otero’, natural de Valga, coñecida como a Bela Otero, bailarina, cantante e actriz residente en Francia, de grande éxito no París da Belle Epoque.