Guía de nomes galegos

Do latín eclesiástico Thomas, -ae, que reproduce o grego neotestamentario Thōmâs. A terminación -é do galego vén posiblemente dun antigo xenitivo. Thomâs é a transliteración do arameo t'ômâ', do hebreo tô'am.m 'xemelgos' e do árabe tau'am, tu'âm 'xemelgo'.

San Tomé (século I), pescador en Galilea, foi un dos apóstolos de Cristo. O Evanxeo de san Xoán fálanos de que dubidou de que fose certa a resurrección do seu mestre ata que apalpou a chaga do seu costado. Segundo a tradición, predicou o Evanxeo na India.

San Tomé de Aquino (1225-1274), frade dominicano italiano, máximo representante da Escolástica, é considerado un dos maiores teólogos da Igrexa. Inicialmente estivo prohibido, pero ao final logrou o que daquela parecía imposible: conciliar a filosofía de Aristóteles co Evanxeo. Foi discípulo de santo Alberte o Magno e coma el profesor na Universidade de París. A súa obra principal foi a Summa Teologica, escrita nos últimos anos da súa vida. Canonizárono en 1323 e declarárono doutor da Igrexa en 1567.

Outros santos tiveron este nome, entre eles dous ingleses: san Thomas Becket (século XII), arcebispo primado de Canterbury que foi asasinado nesta catedral por orde do rei Henrique I; e san Thomas More (1478-1535), autor da Utopía (c. 1516), executado polo rei Henrique VIII por opoñerse ao seu divorcio.

Tamén o levaron Tommaso Campanella (1568-1639), filósofo italiano; Tommaso Albinoni (1671-1750), compositor italiano; Thomas Alva Edison (1847-1931), inventor estadounidense; Thomas S. Eliot (1888-1965), escritor inglés Premio Nobel de Literatura de 1948, entre outros.