Guía de nomes galegos

Do nome hebreo Moxeh, adaptado ao grego e ao latín como Moses ou Moyses. Tense considerado que este nome xurdiu do verbo hebreo maxah 'extraer, tirar fóra', por indicar a Biblia que o seu significado era 'saqueino da auga', pero a etimoloxía máis convincente sería a que ve no nome de Moisés parte dun nome teofórico exipcio, como Tutmoses ou Rameses, 'fillo' dos deuses respectivos. Moisés deriva, seguramente, do exipcio antigo *mshj 'parir', co significado de 'fillo'.

Segundo a Biblia, Moisés (c. 1300-1250 a. C.) foi o libertador e lexislador de Israel, o xefe carismático que deu aos hebreos a súa patria, a súa relixión e a súa lei. Ten unha historia lendaria moi semellante a outras da Mesopotamia. Criado na corte do faraón de Exipto como membro da súa familia, cando descobre a súa verdadeira orixe asume con todas as consecuencias a súa pertenza a un pobo de escravos e humillado, e decide liberalo da escravitude e trasladalo á Terra Prometida (Israel). Conseguida a liberdade, o pobo hebreo vagaría corenta anos polo deserto do Sinaí en castigo ás súas infidelidades co seu deus, Iavé, que lle entrega a Moisés as táboas dos dez mandamentos da Lei (a lei mosaica). Só a segunda xeración dos que saíran de Exipto lograría ver a Terra Prometida, pois o anoxado Iavé nin sequera llelo permitiu a Moisés nin a seu irmán Aarón.

O escritor Moises (ou Mousés) da Presa (Vigo 1904 - Buenos Aires 1981), cofundador da formación arredista Sociedade Nazonalista Pondal de Buenos Aires (1925).