Guía de nomes galegos

Do latín Hercǔles, equivalente ó grego Heracles, o fillo de Xúpiter e de Alcmena. O nome grego deriva de Hera, a muller de Zeus (equivalentes de Xuno e Xúpiter na mitoloxía romana), porque cando naceu esganou as dúas serpes que a deusa mandara para que o devorasen, alporizada pola infidelidade do seu marido.

Hércules é o nome que lle deron os romanos ao heroe mitolóxico grego Heracles, personaxe dotado dunha gran forza, coa que mesmo mataba un león ou os seus propios fillos. Por este crime tivo que realizar doce traballos expiatorios, coñecidos como os “doce traballos de Hércules”.

Na historia mítica galega o heroe clásico Hércules pasa por ser o construtor do faro da Coruña que hoxe leva o seu nome, a torre de Hércules, o máis antigo do mundo entre os faros activos. En realidade é obra romana do século II, construída por un arquitecto lusitano de Coimbra chamado Caio Sevio Lupo. A principios do século V fala da torre-faro de Brigantia —poboación romana que se identifica coa Coruña— o historiador galaicorromano Paulo Orosio. Tamén aparece debuxada nos mapas máis antigos da Península Ibérica, nos confíns da Gallaecia.

Hercule Poirot foi un famoso detective belga creado pola escritora inglesa Agatha Christie.