Guía de nomes galegos

Nome xermánico de introdución recente, emparentado co antigo alemán ernust 'batalla, combate, guerra'.

Santo Ernesto (século XII) foi abade do mosteiro de Zwiefalten, preto de Constanza (Alemaña). Acompañou o emperador xermánico Conrado III na segunda cruzada (1144-1148); prendérono os musulmáns e executárono.

No mundo literario convén lembrar a obra teatral The Importance of Being Earnest (1895), de Oscar Wilde. A tradución literal do título debería ser “A importancia de ser honesto”, pois en inglés o nome de persoa Earnest e o común earnest (‘serio, sincero, honesto’) son palabras homófonas e, polo tanto, o autor xoga co seu dobre sentido, que se perde en non poucas traducións, como a que se fixo para o castelán co título La importancia de llamarse Ernesto, a máis coñecida. En 1999 traduciuna ao galego e publicouna en edición bilingüe Miguel Pérez Romero, co título Ernest. Comedia frívola para xente seria.

Ernestina é unha das personaxes principais da opera de Gioachino Rossini, L'equivoco stravagante (1811, en galego O curioso malentendido).

O escritor norteamericano Ernest Hemingway (1899-1961) e o revolucionario arxentino Ernesto ‘Che’ Guevara (1928-1967). Ernest Shackleton (1874-1922), explorador británico da Antártida. En Galicia, o escritor e filólogo Ernesto Pérez Guerra (Ferrol 1911 - Lisboa 1994) que, tras o seu exilio nos Estados Unidos ao finalizar a guerra civil española, adoptará, xunto coa nacionalidade estadounidense, o nome de Ernesto Guerra da Cal; foi profesor de español e de portugués en universidades norteamericanas e publicou traballos sobre escritores galegos e portugueses.

Na forma feminina, Ernestina Otero Sestelo (Redondela, 1890 - Pontevedra, 1956), profesora de Pedagoxía na Escola Normal de Pontevedra, defendeu a renovación pedagóxica, a coeducación e os dereitos da muller; tras o golpe de Estado de 1936 sería depurada polo franquismo.