Guía de nomes galegos

Nome hebreo dun profeta do Antigo Testamento, a través do latín eclesiástico Elias e o grego bíblico Ēlías, do hebreo Eliyâh(û), nome formado por dous nomes de Deus, Elohim e Yahvé, ambos os dous impronunciables para os hebreos observantes. O nome composto significa 'Deus é Iavé'.

Na Biblia o profeta Elías (século IX a. C.) é a representación da resistencia dos hebreos fieis ao seu deus Iavé nunha época de sincretismo apóstata durante o reinado do rei Acab, na cal se estaba introducindo en Israel o culto ao deus fenicio Baal, deus da fecundidade. Segundo o relato lendario, Elías subiu ao ceo nun carro de lume.

Houbo un santo Elías exipcio, martirizado en Cesarea de Palestina no ano 309.

Ilyá G. Ehrenburg (1891-1967), escritor e xornalista soviético de orixe ucraína e xudía, un dos principais cronistas do Holocausto; e o búlgaro Elias Canetti (1905-1994), escritor en lingua alemá, Premio Nobel de Literatura en 1981.

Elías Valiña Sampedro (1929-1989), natural de Sarria, crego do Cebreiro desde 1959; promoveu a restauración das tradicionais pallozas da súa parroquia e realizou importantes investigacións sobre o Camiño de Santiago, que conseguiu revitalizar, e sinalizouno desde a fronteira francesa con frechas amarelas, polo que é considerado o creador deste símbolo viario que identifica as rutas xacobeas.