Guía de nomes galegos

Elissa é un nome fenicio de etimoloxía descoñecida pero cargado igual de significado pola historia de Elissa-Dido, que chega a nós a través da Eneida de Virxilio. Nalgunhas linguas, en cambio, é hipocorístico de Elisabeth.

A Elissa-Dido da Eneida era esposa de Siqueo, rei de Tiro. Cando o seu irmán Pigmalión deu un golpe de Estado e matou o rei, ela meteu pola calada o tesouro real nun barco e navegou en busca doutro lugar onde fundar unha nova cidade. Esa cidade foi Cartago. Non quixo volver casar, e para os cartaxineses foi o símbolo da viúva fiel.

Elisa Fernández de la Vega (A Veiga, Asturias 1895 -Madrid 1933) e a súa irmá xemelga Jimena foron as primeiras mulleres en estudaren na Universidade de Santiago (1913). Licenciáronse en Medicina en 1919, cos mellores expedientes da promoción.

As mestras galegas Elisa Sánchez e Marcela Gracia constituíron en 1901 o primeiro matrimonio entre persoas do mesmo sexo do que se ten noticia. En 2018 a cidade da Coruña dedicoulles unha rúa, e en 2019 a cineasta catalá Isabel Coixet presentou o filme Elisa e Marcela, rodado en Galicia, que narra a súa historia.

Elisa Patiño Meléndez (1890-1919), coñecida como Chichana, foi a primeira aviadora galega.