Diomedes foi un heroe mitolóxico grego que participou na conquista de Troia; bravo loitador e arteiro orador, aparece nos relatos como compañeiro de Ulises nas delicadas misións que a este se lle encomendaran.
Na versión galega da Crónica troiana (século XIV) protagonizou un famoso trío: a troiana Bresaida, filla do agoireiro Colcas e namorada de Troilo, é enviada ao campamento grego nun intercambio de prisioneiros; alí o seu corazón vai virando e namora de Diomedes.
Outro Diomedes mitolóxico foi rei de Tracia, fillo de Ares e Pirene, que tiña por costume devorar os estranxeiros que invadían o seu país. Foi vencido por Heracles.
San Diomedes foi médico en Nicea e sufriu martirio en Tarso (Cilicia) no ano 304.
