Guía de nomes galegos

Nome bíblico de significación e orixe pouco claras. Pode estar en relación coa raíz grega *dyn- de onde procede dýnamis, 'forza', ou co hebreo din 'xulgar', e de aí, 'xuízo'. Pero semella máis probable ver nel o hipocorístico de nomes femininos rematados en -dina como Blandina ou Claudina, ou mesmo que sexa variante de Digna. Aínda que menos frecuente, tamén se documenta a forma masculina Dino, que tamén pode ser hipocorístico de nomes como Bernardino.

Segundo a Biblia, Dina era filla de Xacob e de Lea. Era unha rapaza nova cando a viu Xequem, fillo do hivita Hamor, que a raptou e violou, pero despois namorouse dela e díxolle ao seu pai que falase con Xacob para concertar o casamento. Hamor e Xacob falaron amigablemente e acordaron mesturar as súas familias. Os varóns xequemitas mesmo aceptaron circuncidarse, pero resulta que Simeón e Leví, fillos de Xacob e irmáns de Dina, mataron coas súas espadas todos os homes xequemitas e logo roubáronlles os bens, nenos e mulleres. Xacob reprendeunos duramente por “facerme noxento para os habitantes desta terra”.