Guía de nomes galegos

Do hebreo Xâ'ûl 'implorado, obtido coas pregarias'. É un dos numerosos nomes hebreos que expresan agradecemento a Deus por un fillo longamente desexado. Segundo outra interpretación significaría 'emprestado, ofrecido' (sobreenténdese que a Deus). A través da Vulgata chegou a nós unha variante, Saulo, que deu un feminino Saula.

Na Biblia, Saúl foi o primeiro rei de Israel, unxido polo profeta Samuel. Ao principio obtivo soadas vitorias contra os filisteus e mostrouse magnánimo, pero despois, envexoso da vitoria do pequeno David fronte ao xigante Goliath, perseguiuno con teimosía. Os seus accesos de melancolía só podían ser calmados pola música. Morreu traxicamente durante un combate contra os filisteus, ao ter noticia da morte dos seus fillos.

Tamén se chamaba así san Paulo antes da súa conversión.

O escritor estadounidense de orixe xudía Saul Bellow (1915-2005), Premio Nobel de Literatura en 1976.