Guía de nomes galegos

Do nome persoal grego Nazōraîos e latino Nazáreus, de orixe étnica, utilizado en ambientes cristiáns co significado de 'nazareno, oriúndo de Nazaré', en latín Názareth, a vila palestina onde transcorre a infancia e mocidade de Xesús. Nos primeiros tempos 'nazareno' era sinónimo de 'cristián', pois con este xentilicio alcumaban os pagáns aos seguidores de Xesús de Nazaré.

San Nazario de Milán (século I) era fillo de pai xudeu e de nai cristiá, santa Perpetua, discípula de san Pedro en Roma. Foi predicar o Evanxeo a Milán e coñeceu a Celso, que se convertería no seu compañeiro inseparable. Despois de iren os dous predicar a Xenebra e a Tréveris volverían a Milán, onde foron decapitados.

Nazario Eguía (1777-1864), militar vasco de ideoloxía  carlista, capitán xeral de Galicia entre 1824 e 1832.

Nazario Belmar Martínez, nado en Elda o 25 de outubro de 1919 e finado en Madrid o 9 de xullo de 1980, foi un futbolista, produtor cinematográfico e avogado español.