Guía de nomes galegos

Do antigo xentilicio romano Marius, tomado do etrusco maru, título dalgún maxistrado ou sacerdote. Segundo algunhas hipóteses, esta palabra significaría 'home'.

Caio Mario (séculos II-I a. C.) era o xefe do partido popular en Roma, que nunha cruenta guerra civil venceu a Sila, do partido dos patricios. Tamén venceu a Xugurta, rei de Numidia. En Roma, os seus inimigos converteron o seu nome en sinónimo de político ambicioso, pero para os revolucionarios franceses de finais do século XVIII foi o heroe da liberdade e da democracia.

San Mario o Persa (século III) viaxou a Roma coa súa esposa Marta e cos seus fillos, e alí sufriron martirio. San Mario de Lausana (século VI) foi bispo de Avenches (Suíza).

Mario Lanza foi o nome artístico do tenor e actor estadounidense Alfredo Arnoldo Cocozza (1921-1959). Tamén o levaron o novelista estadounidense de orixe italiana Mario G. Puzo (1920-1999), autor, entre outras obras, da novela The Godfather (1969), ‘O padriño’; e o político portugués Mário Soares (1924-2017), dúas veces primeiro ministro e unha presidente da República portuguesa.

Mario Benedetti (1920-2009), escritor uruguaio.