Guía de nomes galegos

Do nome persoal romano Marianus, que en orixe foi un adxectivo derivado do xentilicio latino Marius ‘Mario’. Na época cristiá comeza a interpretarse o adxectivo marianus como ‘relativo a María’. Na actualidade a forma feminina adóitase considerar derivada de María ou aglutinación de María e Ana.

San Mariano (século VI) foi anacoreta en Berry (Francia).

Santa Mariana (século I) era irmá de Filipe, un dos doce apóstolos de Cristo. Hai outra santa Mariana de Xesús (século XVII), virxe e penitente de Quito (Ecuador), protectora contra os terremotos.

Marianne é o símbolo da República Francesa desde a Revolución Francesa, como personificación da liberdade, igualdade, fraternidade e razón, así como un retrato da Deusa da Liberdade.

O xornalista e escritor español Mariano José de Larra (1809-1837) e o tenor de orixe vasca Mariano E. González ‘Luis Mariano’ (1914-1970).

Mariana Pineda (século XIX), moza granadina de ideoloxía liberal que foi executada en 1831 por orde do rei absoluto Fernando VII, por bordar unha bandeira en que se lía a palabra “liberdade”. Converteuse na heroína da liberdade e dos liberais españois, e protagonista de moitas obras literarias, entre elas o famoso drama de 1925 do seu paisano Federico García Lorca.